Muhabbetten Muhammed oldu hâsıl

Muhabbetten Muhammed oldu hâsıl,

Muhammed’siz muhabbetten ne hâsıl.

Vâlide Sultan | §

Basmasa mübârek kademin rûy-i zemîne

Basmasa mübârek kademin rûy-i zemîne,
Pâk etmez idi kimseyi hâk ile teyemmüm.

Kazasker Mustafa İzzet | §

Senin mübarek ayağın yeryüzüne basmamış olsaydı,
Toprakla teyemmüm etmek kimseyi temizlemezdi.

Âşık oldur kim, kılur cânın fedâ cânanına

Âşık oldur kim, kılur cânın fedâ cânanına

Meyl-i cânân etmesün her kim ki, kıymaz cânına

Cânını cânâna vermekdür kemâli âşıkun

Vermeyen cân i'tirâf etmek gerek noksânına

Vasl eyyâmı verüp cânâna cân râhat bulan

Yeğdür andan kim salur cânın gam-ı hicrânına

Aşk resmin âşık öğrenmek gerek pervâneden

Kim köyer gördükte şem'ün âteş-i sûzânına

Fâni ol aşk içra kim benzer fenâsı âşıkun

Feyz-i câvîd ile Hızrun çeşme-i hayvânına

Aşk derdinün devâsı terk-i cân etmekdedür

Terk-i cân derler bu derdün mu'teber dermânına

Hiç kim cânân içün cân vermeğe lâf etmesün

Kim gelüpdür bu sıfat ancak Fuzûlî şânına

Ney gibi her dem ki bezm-i vaslını yâd eylerim

Ney gibi her dem ki bezm-i vaslını yâd eylerim

Tâ nefes vardır kuru cismimde feryâd eylerim

Rûz-ı hicrândır sevin ey murg-ı rûhum kim bugün

Bu kafesten ben seni elbette âzât eylerim

Vehm edüp tâ salmaya sen mâha mihrin hîç kim

Kime yetsem cevr ü zulmünden ana dâd eylerim

Kan yaşım kılmaz vefâ giryân gözüm isrâfına

Bunca kim her dem ciğer kanından imdâd eylerim

İncimen her nice kim ağyâr bî-dâd eylese

Yâr cevri için gönül bî-dâda mu'tâd eylerim

Bilmişim bulman visâlin lîk bu ümmîd ile

Gâh gâh öz hâtır-ı nâ-şâdımı şâd eylerim

Levh-i âlemden yudum eşk ile Mecnûn adını

Ey Fuzûlî ben dahi âlemde bir ad eylerim

Perîşân halk-ı âlem âh ü efgân ettiğimdendir

Perîşân halk-ı âlem âh ü efgân ettiğimdendir

Perîşân olduğum halkı perîşân ettiğimdendir

Ten-i zârımda derd-i aşk gün günden füzûn olmak

Yeten bî-derde tedbîr ile dermân ettiğimdendir

Gözüm kim bağrımın kanın döker perkâle perkâle

Dem-â-dem ârzû-yi la’l-i cânân ettiğimdendir

Değil bi-hûde ger yağsa felekten başıma taşlar

Binâsın tîşe-i âhımla virân ettiğimdendir

Kaçan rüsvâ olurdum, kan yutup sabr edebilseydim

Melâmet çektiğim bî-hûde efgân ettiğimdendir

Hatâ senden değil cismim okundan bî-nasîb olmak

Habâb-ı eşk-i gül-gûn içre pinhân ettiğimdendir

Fuzûlî ihtilât-ı merdüm-i âlemden ikrâhım

Perî-veşler hayâlin mûnîs-i cân ettiğimdendir